20 октябри соли 2026 дар шаҳри Душанбе, дар меҳмонхонаи «Фирдавсӣ», дар доираи лоиҳаи «БОВАРӢ» семинари омӯзишӣ оид ба истифодаи низоми таҳияшудаи ошкорсозии барвақт ва вокуниш (EDR) бо иштироки 15 намояндаи 15 шаҳру ноҳияи Тоҷикистон ва ду тренер баргузор мегардад. Барнома кори гурӯҳӣ оид ба эҳтиёҷоти маҳаллӣ ва имкониятҳои дастгириро бо омодасозии амалии тренерон фаро мегирад.
Лоиҳаи «БОВАРӢ» аз ҷониби Search for Common Ground дар ҳамкорӣ бо Фонди миллии «Шоҳроҳи абрешим шоҳроҳи ваҳдат» ва бо дастгирии Прокуратураи генералии Ҷумҳурии Тоҷикистон амалӣ мегардад.
Таҳияи механизми EDR ба зиммаи Маркази коршиносию таҳлилии «Таҳлил» гузошта шудааст. Саҳми марказ корҳои таҳлилӣ ва методиро — аз муайян намудани тартиби фаъолияти механизм ва нақши иштирокчиён то таҳияи воситаҳои корӣ ва омӯзонидани тарзи истифодаи онҳо — фаро мегирад. Ба санҷиши иттилоот, риояи махфият ва робитаи бозгашт таваҷҷуҳи махсус зоҳир мешавад. Ин кор ба истифодаи донишҳои коршиносӣ барои таҳияи роҳҳои ҳалли амалӣ ва фаҳмо барои мутахассисони маҳаллӣ мусоидат менамояд.
Дар қисми аввали рӯз иштирокчиён тағйироти мушоҳидашаванда дар ҷомеаҳои маҳаллӣ, нишонаҳои ташаннуҷ ва роҳҳои дастгириро баррасӣ хоҳанд кард. Кори гурӯҳҳои хурд ба таҳия ва санҷиши ибтидоии нишондиҳандаҳои маҳаллӣ, дақиқ намудани мушоҳидаҳо ва интихоби роҳҳои бехатари вокуниш равона мешавад.
Дар қисми дуюми рӯз машғулиятҳо барои омодасозии тренерон ҷиҳати истифодаи EDR баргузор мегарданд. Ҳадаф ва сохтори механизм, нақши иштирокчиён, шаклҳои корӣ, сабт ва санҷиши иттилоот, риояи махфият ва робитаи бозгашт мавриди омӯзиш қарор мегиранд. Иштирокчиён вазъияти намунавиро баррасӣ намуда, гузаронидани бахшҳои алоҳидаи машғулиятро амалан тамрин хоҳанд кард.
Ҳадафи омӯзиш омода намудани тренерон барои омӯзонидани аъзои гурӯҳҳои машваратии маҳаллӣ оид ба пешгирии ифротгароии хушунатомез дар доираи даври дуюми мизҳои гирди минтақавӣ мебошад.
Сана ва макон: 20 октябри соли 2026, шаҳри Душанбе, меҳмонхонаи «Фирдавсӣ», кӯчаи Ш. Ҳусейнзода, 2/1.
Вақти баргузорӣ: 09:00–16:00. Омодасозии тренерон оид ба EDR: 14:00–16:00.